اهداء

الى من كان سببا فى انشاء هذه المدونة

الى من اثرت فى كلماته فغيرت بعض افكارى

اهدى هذه المدونة

ـــــــــــــــــــــــــــــــــــــــــــــــــــــــــ

لان دى اول مرة فى حياتى اعمل مدونة مع انى متابع للكثير من المدونات من فترة ولكن كقارىء فقط واحيانا كنت اشارك ببعض الردود لكن ماكنتش مهتم ان يكون لى المدونة الخاصة بى

مع اننى باحب الكتابة جدا بس كنت بافضل ان اكتب لنفسى فقط وان اللى بكتبه محدش يشوفه غيرى

كنت مقتنع انه مافيش سبب يخلينى اعمل مدونة اكتب فيها والناس تقرى اللى انا باكتبه لكن حصلت حاجة من كام يوم كانت سبب فى انى اغير رأيى واقرر انى يكون لى مدونة خاصة بى واكتب فيه عن افكارى ومشاعرى وتجاربى

.......................

...................

وطبعا المفروض ان اول بوست ليا فى المدونة وزى ما شوفت فى معظم المدونات ـــ ما انا اصلى لسة مستجد ـــ انهم تقريبا غالبا احيانا بيكتبوا عن اسباب دخولهم الى عالم التدوين

بس لانى بحب اكون دايما مختلف قررت انى مش هتكلم عن السبب ولكن على الحد اللى كان السبب هو يعنى مش هاتكلم عنه كتير لانى لسة ماعرفش عنه كتير لكن هاقول اللى يقدرنى عليه ربنا

هو باختصار حد لما زرت المدونة بتاعته وقريت اللى فيها كلامه اثر فيا جدا بشكل غريب مش عارف ليه

بس يمكن علشان حسيت بالصدق فى كلامه وانه طالع من القلب بجد

وجايز كمان لانى مريت ببعض الاحاسيس والمشاعر اللى اتكلم عنها

مش عارف ليه بالظبط المهم انى اتاثرت بكلامه فعلا

و خلانى افكر انه هايكون افضل كتير جدا لما نشارك بعض بافكارنا و مشاعرنا وتجاربنا وخبراتنا لاننا ببساطة مش لوحدنا فى الدنيا دى و زى مافى ناس كتير مرت بنفس الاحاسيس و بنفس التجارب اللى انا مريت بيها فى كمان لسة ناس تانية هتيجى وهتحس نفس الاحاسيس وهتمر بنفس التجارب

ولان ساعتها الواحد كان فاكر انه لما كان فى المشكلة انه مافيش غيره فيها وانه الفريد من نوعه الوحيد اللى عنده المشكلة دى وطبعا دة مش صحيح

علشان كدة قررت انى اشارك

........................

انا عملت المدونة علشان اشارك احاسيسى وتجاربى وافيد وكمان استفيد وانقل خبرتى فى التجارب دى وازاى قدرت اتغلب عليها واخرج منها الحمد لله ولو عندى مشكلة يمكن الاقى عند حد تانى خبرات مش عندى استفيد بيها

......................

ها فى حد حابب يشارك

.....................

.....................

واخيرا

زى ما بدأت كلامى هانهيه بانى
بهدى المدونة دى بكل ما فيها من كلمات واحاسيس ومشاعر وتجارب لهذا الانسان الذى كان سببا باذن الله فى خروجها للنور

اسال الله ان يكون فيها خير كثير ونفع لكل الناس ان شاء الله

واسأله سبحانه من فضله وكرمه ان يجعل هذا الشخص شريكى فى الاجر والثواب

ان شاء الله

انه على ما يشاء قدير

..................